Skip to content

Jún 9

4 athugasemdir

Kjúklingasalat með kirsuberjum

Ég hef mjög ákveðnar skoðanir þegar kemur að kjúklingakjöti. Ég er nefnilega voðalega lítið spennt fyrir skinnlausum, beinlausum kjúklingabringum. Ég veit að það er sagt vera ,hollasti’ partur fuglsins og fleira í þeim dúr. En ekki aðeins finnst mér frekar leiðinlegt að matreiða þær heldur finnst mér kjötið yfirleitt of þurrt og lítið spennandi miðað við aðra parta fuglsins. Í mestu uppáhaldi hjá mér eru lærin – með beini og með skinni. Kjötið er meyrara, dekkra, bragðmeira og almennt miklu skemmtilegra að elda. Ég var því mjög spennt þegar ég fletti gömlu eintaki af Bon Appétit og rakst á uppskrift sem notar kjúklingalæri og lætur mann elda skinnið þar til það verður stökkt og skemmtileg viðbót í ferskt salat.

Við Elmar erum mjög hrifin af matarmiklum salötum og eldum t.d. steikarsalatið góða reglulega. Þetta salat er engu síðra og er núna eitt af uppáhaldsréttunum okkar (Elmar setur það m.a.s. í topp tíu af öllu því sem ég hef eldað síðustu árin). Það kom mér á óvart hvað kirsuberin pössuðu vel í salatið og hvað dillið í salatsósunni gaf skemmtilegt bragð. Nú tel ég að kirsuber séu kannski ekkert svo aðgengileg heima en ég held að vel þroskaðir kirsuberjatómatar myndu vera ágætis uppbót. En ef þið finnið kirsuber þá er þetta frábær leið til að borða þau.

SJÁ UPPSKRIFT

Jún 6

Afmæliskaka Elmars

Elmar átti afmæli í gær. Við lögðum skólabækurnar til hliðar og ákváðum að eiga rólegan dag saman. Við fórum á uppáhaldsbarinn okkar, Bierkraft, sátum úti undir sólarhlíf, borðuðum osta og Elmar keypti sér dýrindis belgískan bjór. Um kvöldið borðuðum við á frábærum ástralsk-asískum stað hérna í hverfinu og löbbuðum út hálf rangeygð af seddu og matarhamingju.

 Það er mín skoðun að afmælisbörn eiga skilið köku. Og þá meina ég alvöru heimabakaða köku á hæðum og með kremi. Ég hef áður sett inn færslu um afmæliskökuna mína og um afmælisköku vinkonu okkar sem hefur síðan flust frá Brooklyn og ég sakna alveg afskaplega mikið og ekki má gleyma fimmtugskökubombunni hennar mömmu. Afmælisbörn eiga líka skilið vín með kökunni og góðan hóp fólks til að skála fyrir merkisdeginum. 

Elmar er mikill kaffimaður. Svo mikill að dagurinn getur hreinlega ekki byrjað fyrr en hann er búinn að fá sér fyrsta kaffibollann. Mér fannst því við hæfi að búa til kaffiköku með kaffikremi og fann loks uppskrift sem heillaði mig í tímaritinu Bon Appétit, kaffibragð fyrir Elmar og súkkulaði fyrir mig. Botnarnir eru unaðslegir og ég hugsa að ég eigi eftir að nota þá oft upp úr þessu. Kremið er létt í sér og mjúkt og hefur lúmskt bragð af café mocha, mér fannst það samt helst til of sætt (þrátt fyrir að hafa minnkað sykurmagnið) og ég mæli með að minnka það jafnvel enn meira en ég gerði. Ég bakaði þrjá 8 tommu botna en það má auðvitað hafa kökuna tveggja hæða í staðinn fyrir þriggja.

Það lýstu allir yfir mikilli ánægju með kökuna og ég hef æði oft læðst í smá sneið af afganginum í dag. Yndislegt!

SJÁ UPPSKRIFT

Jún 2

Jarðarberjafrostpinnar

Við erum vel undirbúin fyrir hitann hérna úti. Við eigum ísvél, risastóra viftu sem er á fullu þegar loftkælingin er ekki í gangi og bara um daginn splæsti systir mín í frostpinnamót handa mér. Og ég gæti varla verið ánægðari með það. Það er svo ótrúlega auðvelt að búa til frostpinna og það er svo einstaklega skemmtilegt að búa þá til sjálf úr ferskum ávöxtum og vita að þeir eru ekki pakkaðir óþarfa aukaefnum.

Mér sýnist nú á öllu að veðrið sé álíka sólríkt og yndislegt á Íslandi og ég vona að það sé bara forsmekkurinn að góðu sumri. Enda kem ég heim eftir mánuð og mig langar sko ekki til að lenda í því aftur að upplifa 30 stiga hitabreytingu. Fyrst að veðrið leikur svo við okkur öll þá langar mig til að benda ykkur á nokkrar frískandi og sumarlegar uppskriftir sem við Elmar höldum mikið upp á.

Engiferöl, ískaffi, læmónaði. Sorbetar (t.d. mangó, jarðarberja, rabarbara).

Má ég líka stinga upp á sumarpartýi undir berum himni með mexíkósku þema: Guacamole, carnitas og quesadillur. Með bjórgarítum? Ég er viss um að það geti ekki klikkað.

SJÁ UPPSKRIFT

Maí 29

Greip- og hunangsskonsur

Það er svo heitt hérna. Að langflestu leyti finnst mér það eiginlega alveg frábært og nýt þess að finna hitann ná mér inn að beini. En mikið óskaplega langar mig líka út úr borginni, langt frá steinsteypunni, eitthvert út í sveit þar sem ég get legið í grasinu, grillað á kolagrilli og jafnvel dýft tánum í sjó eða vatn. Náttúrulífið í borginni er samt ósköp fallegt og við búum vel að því að búa rétt hjá Prospect Park þar sem maður getur komið sér fyrir undir skugga trjánna, horft á fiðrildin og fuglana og ímyndað sér að maður sé langt frá ys og þys borgarinnar.

Það mætti því ætla að ég væri orðin eitthvað verri að ákveða að kveikja á ofninum og baka þegar úti er glaðasólskin og 32 stiga hiti. Kannski er það ekki svo fjarri lagi en ég var bara svo svöng og mig (eða má ég kenna ófæddu barninu um?) langaði bara í skonsur. Ég átti greipávöxt því í einhverju bjarstýniskasti í Whole Foods sannfærði ég mig um að slíkt væri góður morgunmatur (en svo bjó ég til granóla í staðinn). Sem það örugglega er, en hver verður saddur af einu greipi á morgnana? Þannig að greipið lá fyrir skemmdum þegar ég rakst á þessa uppskrift hjá henni Joy og úr því urðu þessar ljómandi góðu og einkennilega frískandi skonsur.

Má ég mæla með þeim nýbökuðum með smjöri ásamt kaffibolla, með þetta lag á fóninum?

SJÁ UPPSKRIFT

Maí 26

6 athugasemdir

Granóla með hunangi og möndlum

Þegar systir mín var í heimsókn þá borðuðum við morgunmat á ástralska kaffihúsinu Milk bar sem er hérna í nánasta nágrenni. Ég fékk mér granólað þeirra sem þeir blanda og rista á staðnum með grískri jógúrt og ég hef varla hugsað um annað síðan. Ég vakna á morgnana og það eina sem mig langar virkilega í að borða er granólað þeirra og á hverjum morgni þarf ég að minna mig á að ég verð að sýna smá aga og skynsemi og fá mér eitthvað að nasla heima. Því að þetta blessaða granóla þeirra með gríska jógúrtinu og ávöxtum kostar átta dali. Átta dali! 

Eins og skynsamri og ágætlega eldhúsvanri manneskju sæmir þá ákvað ég bara að taka málin í mínar eigin hendur. Ég týndi fram þær hnetur, fræ, hafra og þurrkaða ávexti sem ég fann inni í skáp, sullaði slatta af hunangi yfir og skellti inn í ofn. Eftir nokkrar mínútur byrjaði íbúðin að ilma af ristuðum hnetum og hunangi og eftir nokkrar mínútur í viðbót tók ég út fallega gyllt granóla með möndlum og pekanhnetum.

Og núna á ég stóra krukku af granóla inni í ísskáp og get búið mér til þennan dýrindis morgunmat fyrir miklu miklu minna en átta dali. Ég set smá hreina gríska jógúrt í skál, set smá hunang út í jógúrtið og hræri, sáldra granóla yfir og toppa með ferskum berjum (í þetta sinn bláberjum). Ekki láta plata ykkur til að kaupa lítinn poka af granóla á himinháu verði því heimaristað granóla er svo einfalt og svo ljúffengt. Uppskriftina má auðvitað laga að því sem til er í skápunum hjá ykkur – notið þær hnetur sem þið hafið við höndina, sleppið sykrinum ef þið eruð ekki sömu sætindagrísir og ég og skellið smá þurrkuðum ávöxtum eða súkkulaðidropum út í ef slíkt heillar ykkur.

SJÁ UPPSKRIFT

Maí 24

Ein athugasemd

Rabarbarasorbet

Þá er ég búin að kveðja systur mína eftir yndislega viku sem leið alltof hratt. Litla kotið virðist ansi tómlegt og það verður skrítið að detta aftur í daglega rútínu af lærdómi og skriftum. Við vorum mjög dugleg að labba um hin ýmsu hverfi Brooklyn, skoðuðum hinn fræga og víðáttumikla Greenwood grafreit, flatmöguðum í sólinni í Prospect Park og átum á okkur gat við hvert tækifæri. Þetta er fimmta ferð Emblu til New York en í fyrsta skiptið sem hún eyðir tíma utan Manhattan og hún var fljót að lýsa því yfir að þrátt fyrir mikla hrifningu á Manhattan þá væri Brooklyn mun skemmtilegri. Sem ég get tekið heilshugar undir.

Við vöknuðum snemma á laugardagsmorgninum, hengdum myndavélarnar um hálsinn og töltum út á bændamarkaðinn. Jarðarberjatíðin er greinilega að ná hámarki – ljúfur og sætur ilmur lá í loftinu og við vorum ekki lengi að því að grípa nokkra bakka af jarðarberjum, eitt knippi af rabarbara og annað af aspas og ýmislegt góðgæti beint frá býli.

Við fórum á frábæran veitingastað í Fort Greene í einum göngutúrnum okkar og deildum tveimur ískúlum. Annar ísinn var rabarbarasorbet með engiferi sem var svo ferskur og bragðgóður að ég mátti til með að nýta rabarbarann í að búa til minn eigin. Ég lagðist í smá rannsóknir og fann uppskrift á netinu sem notar ekki of mikinn sykur á móti rabarbara og útkoman er þessi fallega bleiki sorbet með ljúfu rabarbarabragði og smá vísi að engiferi. Upprunlega uppskriftin notar smá sterkt áfengi til að koma í veg fyrir að sorbetinn frjósi um of en það má auðvitað sleppa áfenginu og leyfa ísnum bara að standa við stofuhita í nokkrar mínútur eftir að hann er tekinn úr frysti til að mýkja hann aðeins.

SJÁ UPPSKRIFT

← Older Entries
Newer Entries →