Rabarbarasorbet

Þá er ég búin að kveðja systur mína eftir yndislega viku sem leið alltof hratt. Litla kotið virðist ansi tómlegt og það verður skrítið að detta aftur í daglega rútínu af lærdómi og skriftum. Við vorum mjög dugleg að labba um hin ýmsu hverfi Brooklyn, skoðuðum hinn fræga og víðáttumikla Greenwood grafreit, flatmöguðum í sólinni í Prospect Park og átum á okkur gat við hvert tækifæri. Þetta er fimmta ferð Emblu til New York en í fyrsta skiptið sem hún eyðir tíma utan Manhattan og hún var fljót að lýsa því yfir að þrátt fyrir mikla hrifningu á Manhattan þá væri Brooklyn mun skemmtilegri. Sem ég get tekið heilshugar undir.

Við vöknuðum snemma á laugardagsmorgninum, hengdum myndavélarnar um hálsinn og töltum út á bændamarkaðinn. Jarðarberjatíðin er greinilega að ná hámarki – ljúfur og sætur ilmur lá í loftinu og við vorum ekki lengi að því að grípa nokkra bakka af jarðarberjum, eitt knippi af rabarbara og annað af aspas og ýmislegt góðgæti beint frá býli.

Við fórum á frábæran veitingastað í Fort Greene í einum göngutúrnum okkar og deildum tveimur ískúlum. Annar ísinn var rabarbarasorbet með engiferi sem var svo ferskur og bragðgóður að ég mátti til með að nýta rabarbarann í að búa til minn eigin. Ég lagðist í smá rannsóknir og fann uppskrift á netinu sem notar ekki of mikinn sykur á móti rabarbara og útkoman er þessi fallega bleiki sorbet með ljúfu rabarbarabragði og smá vísi að engiferi. Upprunlega uppskriftin notar smá sterkt áfengi til að koma í veg fyrir að sorbetinn frjósi um of en það má auðvitað sleppa áfenginu og leyfa ísnum bara að standa við stofuhita í nokkrar mínútur eftir að hann er tekinn úr frysti til að mýkja hann aðeins.

Rabarbarasorbet

(Uppskrift frá The Year in Food)

• 360 g rabarbari, skorinn í sneiðar
• 1 bolli vatn
• 1/2 bolli sykur
• 1 – 2 tsk ferskt engifer, rifið
• 2 msk ferskur sítrónusafi
• 2 msk gin eða vodka (má sleppa)
• 1/4 tsk salt

Aðferð:

Sjóðið saman rabarbara, vatn, sykur, engifer og sítrónusafa þar til rabarbarinn verður mjúkur og fer að liðast í sundur. Takið af hitanum og maukið með töfrasprota, matvinnsluvél eða blandara þar til blandan verður kekkjalaus. Hrærið gini og salti saman við. Kælið blönduna alveg annaðhvort inni í frysti í ca. 1 klukkustund eða inni í ísskáp í nokkra klukkutíma eða yfir nótt.

Frystið í ísvél samkvæmt leiðbeiningum frá framleiðanda.

Prenta uppskrift