Jólagjafahugmynd #3: Ristaðar chílehnetur með rósmaríni

Ég er svolítið sein með þessa færslu því ég er búin að liggja í flensu í óralangan tíma. Ég reif mig framúr rúminu síðasta fimmtudag og skellti í mig einu staupi af bourbon til að hafa orku til að elda þakkargjörðarmat með Elmari og mæta með réttina okkar þrjá í mjög skemmtilegt matarboð (meira um það seinna). En, eins og ég hefði átt að gera mér fyllilega ljóst, sló mér niður aftur og ég flakkaði á milli sófans og rúmsins í allan gærdag. Og mikið afskaplega er það óendanlega leiðinlegt.

Þessi uppskrift er virkilega einföld og fljótlega gerð. Hún ætti því að vera sniðug fyrir þá sem eiga eftir einhverjar jólagjafir á Þorláksmessu og hreinlega geta ekki hugsað sér að ramba á milli búða til að finna eitthvað. Hneturnar eru líka ljómandi ljúffengar, góðar með jólabjór og sérstaklega hentugt partísnakk. Íbúðin okkar ilmar eins og rósmarín og ristaðar hnetur núna og mig er farið að klæja í fingurna að fá að hengja upp það litla jólaskraut sem við eigum.

Ristaðar chílehnetur með rósmaríni

(Uppskrift frá Gourmande in the kitchen)

• 5 bollar [700 g] blandaðar hentur, ósaltaðar og óristaðar
• 1/4 bolli ólívuolía
• 1/4 bolli ferskt rósmarín, fínsaxað
• 4 tsk sjávarsalt
• 1/2 tsk cayennepipar
• 1/4 tsk chíleflögur

Aferð:

Hitið ofninn í 180C/350F. Setjið grindina í miðjan ofninn. Setjið bökunarpappír á ofnplötu.

Setjið öll hráfenin í stóra skál og veltið til að blanda öllu vel saman. Hellið hnetunum á ofnplötuna og dreifið úr þeim svo að þær séu í einu lagi. Bakið þar til hneturnar eru ljósbrúnar og ristaðar, í 10 til 15 mínútur.

Leyfið að kólna og berið fram.

Geymið í loftþéttum umbúðum við stofuhita.

Prenta uppskrift