Posts from the ‘Vikulok’ Category

Vikulok

Þórdís Yrja vex og dafnar á ótrúlegum hraða (myndin hér að ofan var tekin þegar hún var fjögurra vikna gömul). Hún er farin að smakka mat og ég verð að viðurkenna að ég er búin að hlakka mikið til þessa tíma. Ég er því farin að lesa mér aðeins til og hafði gagn og gaman af færslunni hennar Soffíu (Húsið við sjóinn). Við erum auðvitað mjög heppin með aðgang að góðum matvælum en það er margt sem ber að varast. Ekki er allt sem sýnist í matarmenningunni hérna í Bandaríkjunum og framleiðendur hafa ekki vílað fyrir sér með að markaðsetja ýmsan óþverra sem barnamat. Ég keypti fullt af lífrænum eplum af bændamarkaðinum um daginn og sauð niður eplamauk sem ég svo frysti í klakaboxum handa Þórdísi. Ég styðst mikið við síðuna sem Deb skrifaði þegar strákurinn hennar var lítill – þar eru uppskriftir og leiðbeiningar um tæki og tól.

Hverfið okkar og nærliggjandi Crown Heights hverfið eru orðin svo afskaplega hipp og kúl að við höfum ekki undan að prófa ný kaffihús. Eftir að Elmar las sér til um nýlegan stað rétt hjá okkur ákváðum við að fara í smá könnunarleiðangur. Crosby Coffee er ofboðslega fallegt, bjart og notalegt kaffihús með mjög góðu kaffi. Ég tók þessa einu mynd en Alice Gao á Lingered Upon hefur myndað það mun betur.

Það snjóaði líka hjá okkur fyrir helgi og ég held í vonina um að þetta sé síðasta snjókoma vetrarins.

Ég er svo þakklát fyrir að geta streymt íslenska útvarpsþætti frá RÚV. Ég hef hlustað á Morgunstund með KK yfir fyrsta kaffibollanum mínum undanfarna morgna og það kemur deginum þægilega í gang.

Lagið  Wild is the Wind með Ninu Simone er búið að vera í sífelldri endurspilun hjá mér.

Vonandi áttuð þið góða viku!

Vikulok

Það er fátt sem mér finnst betra en góður morgunmatur. Við höfum samt bara borðað hafragraut á hverjum morgni síðustu vikur og ég hef látið mig dreyma um margbreytileika morgunmatarins í gegnum ljósmyndbloggið simply breakfast.

Mér finnst mjög skemmtilegt að heyra að fólk sé að elda eftir uppskriftum sem ég deili. Ég verð ennþá glaðari við að sjá fólk njóta afrakstursins. Þessar súkkulaðibitakökur eru í algjöru uppáhaldi hjá okkur líka.

Ég veit að það er kominn mars en mig langar frekar mikið til að gefa Elmari þetta dagatal.

Það eru margar skemmtilegar heimsóknir framundan og því vona ég að það vori sem fyrst svo að fólk geti notið fallegustu árstíðarinnar í borginni. Tengdaforeldrar mínir koma í heimsókn í lok mars og við vorum svo ótrúlega heppin að finna þessa íbúð á Airbnb fyrir þau. Spurning hvort maður geri nokkuð annað en að súpa á kaffi á svölunum og njóta útsýnisins.

Vonandi áttuð þið góða viku!

Vikulok

Það vantar svolítið mikið upp á að ég geti galdrað fram góða kokkteila án þess að leggjast í rannóknir eða halda mig við eitthvað klassískt. Um daginn blandaði ég mér Dark and Stormy – romm í engiferbjór með límónu – og ég hef sjaldan grett mig eins mikið við hvern sopa. Mér fannst þetta sérstaklega leiðinlegt þar sem í drykkinn fór skemmtilegt romm sem vinkona mín gaf mér þegar hún kom frá Dóminíska Lýðveldinu.

Þegar ég sit á kaffihúsinu og reyni að læra þá hlusta ég yfirleitt alltaf á sömu tónlistina. Ég prófaði að hlusta á nýjustu plötu Sin Fang um daginn og hún hefur verið í reglulegri spilun síðan. Ég lyftist upp þegar þetta lag fer af stað.

Ég er búin að merkja við nokkrar uppskriftir á öðrum matarbloggum sem ég er mjög spennt fyrir að prófa á næstunni.

Þetta kókosgranóla.

Þessi drykkur.

Þessi kaka.

Ég er svo hrifin af brúnum sem tengja Brooklyn við Manhattan. Þær eru myndrænar í hvaða veðri sem er. Mér þykir sérstaklega vænt um Manhattanbrúna en lestin sem við ferðumst oftast með fer yfir hana og maður fær oft fallegt útsýni yfir flóann, Frelsisstyttuna og neðri hluta Manhattan. Skemmtileg tilbreyting frá því að vera í dimmum lestargöngum.

Vonandi áttuð þið góða viku!

[Í röð: Brooklynbrúin, Manhattanbrúin, Williamsburgbrúin]

Vikulok

Ég hef ekki verið nógu dugleg að lesa mér til gamans undanfarið. Ég er að reyna að ráða bót á þessu og er núna að lesa My Life in France eftir Juliu Child. Hún er mjög skemmtileg og gefur bæði innsýn inn í matarheim Child sem og lífið í París stuttu eftir seinna stríð. Bókin höfðar bæði til matar- og sagnfræðisnördsins í mér og ef aðrir deila þessum áhugamálum mínum þá mæli ég með henni. Aðrar bækur á náttborðinu eru Appelsínur frá Abkasíu eftir Jón Ólafsson og matreiðslubókin Plenty eftir Yotam Ottolenghi sem ég var að fá að gjöf.

Ég er mikill aðdáandi Joy the Baker. Hún er ótrúlega dugleg, óhrædd við að vera hún sjálf og uppskriftirnar hennar eru alltaf ljúffengar. Í vikunni skrifaði hún færslu um það að blogga – 10 Real-Talk Blog Tips Part II (hér finnið þið fyrri partinn). Fyrir þau okkar sem halda úti matar- og lífstílsbloggum eða eru að íhuga slíkt ætti þetta að vera skemmtileg lesning.

Fyrir mig er þetta líka góð áminning. Af og til (en afar sjaldan) velti ég því fyrir mér að hætta með þetta blogg, svona þegar mér finnst síðan hálfeinmanaleg og ég á erfitt með að finna tíma til að sinna henni. En svo verð ég þess áskynja að mér þykir svo vænt um það sem ég skrifa, mynda og skapa hérna að ég myndi ekki tíma að hætta. Ég tek því undir með Joy – „just have a doughnut and keep going“.

Og talandi um kleinuhringi. Eruð þið búin að kaupa ykkur kleinuhringjamót? Ég er búin að búa til þessa kleinuhringi fjórum sinnum á síðustu tveimur vikum. Alltof gott og alltof fljótlegt.

Íslensku vefverðlaunin voru haldin í síðustu viku og ég var himinlifandi með að Lemúrinn hafi unnið í sínum flokki. Þessi vefsíða er algjör snilld og ég get gleymt mér við að lesa greinarnar þeirra. Þau eru iðin við kolann og eiga þessa viðurkenningu fyllilega skilið. High-five!

Vikulok

Snjóstormurinn Nemó kom og fór og hafði lítil áhrif á hverfið okkar. Önnur en hversu fallegt og hljótt allt varð í hvítum snjónum.

Ég er ekki óvön langdvölum frá Íslandi. Ég bjó í Tókýó í sex ár sem unglingur og hef núna búið í tæplega fimm ár í Skotlandi og Bandaríkjunum. Það eru mikil forréttindi að fá að búa erlendis og upplifa nýja og áður óþekkta staði á svo náinn hátt. En það koma stundir þar sem Ísland kallar á mig. Það byrjar eins og lágvært hvísl en svo finn ég mig hugsa heim með miklum söknuði. Þessi tímabil líða alltaf hjá en það er auðvelt að hugsa til himins sem teygir úr sér út í óendanleikann þegar sýn manns er sífellt innrömmuð byggingum. Þegar skvaldur í fólki, drunur í bílum og skerandi sírenuvél er í endurteknu undirspili þá hugsa ég ósjálfrátt til náttúrunnar heima og þagnarinnar sem henni fylgir. Ég held að þessi færsla um Ísland hafi kynt undir þessum söknuði.

Kannist þið við matarvefsíðuna The Kitchn? Ég skoða þessa síðu mjög reglulega. Hún er með uppskriftir, innlit í eldhús, fróðleik um hráefni og meðhöndlun á því, og svo mætti lengi telja. Hún er líka uppfærð oft þannig að það er alltaf eitthvað nýtt að skoða.

Sóley heldur tónleika á bar rétt hjá okkur í lok mánaðarins. Ég er orðin friðlaus mig langar svo að fara með Elmari en þar sem vöntun er á pössun þá köstum við líklega krónu upp á hvort okkar fái að fara.

Kuldakastið heldur áfram hjá okkur. Það snjóar reglulega og frostið bítur í kinnar. Ég reyni eftir fremsta megni að hugsa ekki of mikið til vorsins en þó gafst ég upp um daginn og keypti vönd af fjólubláum túlípönum til að gera biðina aðeins bærilegri.

Vonandi höfðuð þið það gott í vikunni!

Vikulok

Mig langaði til að breyta aðeins til og vera með vikulegar færslur sem fela ekki endilega í sér uppskriftir. Þessar færslur verða örugglega frekar óskipulagðar til að byrja með en mig langar til að deila aðeins meira með ykkur en bara því sem ég hef verið að sýsla í eldhúsinu.

Kannski er það kuldinn sem fær mig til að dreyma um Ítalíu að sumri til en ég hef ekki hætt að hugsa um ferðalag þangað síðan ég rakst á þessi kot til leigu á Airbnb. Þekkið þið Airbnb? Þessi síða er algjör snilld og gerir manni kleift að leigja herbergi/íbúðir/hús/villur/eyjur alls staðar í heiminum. Og oftast á mun lægra verði en hótel. Kynningarmyndband þeirra finnið þið hér. Við leigðum íbúð í Montréal þegar við fórum þangað síðasta sumar og spöruðum heilmikið í matar- og hótelkostnað.

Og meira um Ítalíu (ég er að þróa með mér smá þráhyggju, ég er viss um það). Ég fann tvö blogg um ítalska matseld um daginn. Emiko Davies býr í Ástralíu en skrifar um mjög hefbundna ítalska matseld. Valeria Necchio býr í London og skrifar um heilsusamlegan og einfaldan mat. Síðurnar þeirra eru mjög fallegar og listrænar.

Mér finnst Instagram vera skemmtileg leið til að miðla hluta af lífi manns. Ég er virk þar og það má finna mig undir nafninu ivesturheimi. Ég held mikið upp á bóndann í Suður-Englandi, ljósmyndarann í New York og listakonuna og ferðalanginn frá Brooklyn.

Ég er búin að hlusta mikið á íslenska tónlist undanfarið. Platan Í annan heim með Rökkurró er í miklu uppáhaldi hjá mér og hefur verið í sífelldri spilun síðasta árið. Þessir krakkar eru alveg yfirgengilega hæfileikarríkir og ég bíð spennt eftir næstu plötu.

Vonandi áttuð þið góða viku!