Skip to content

Tælenskt vatnsmelónusalat

Það er liðinn rúmur mánuður frá því ég setti inn færslu síðast. Ég skammast mín svolítið og vona að fólk haldi ekki að ég sé hætt, því það er ég svo aldeilis ekki. Ég er reyndar búin að vera mikið að heiman þennan mánuðinn og ég hef líka átt erfitt með að finna innblástur til að elda eitthvað nýtt. En nú er ég endurnærð og farin að leggjast yfir uppskriftir og matarblogg af jafnmiklum áhuga og áður. Ég var svo heppin að fá að ferðast til Eistlands til að taka þátt í námskeiði fyrir framhaldsnema í heimspeki og ég var þar í góðu yfirlæti í rúma viku.

Eftir brösulegt ferðalag aftur heim til New York þar sem ég lenti í seinkun á flugi, yfirheyrslu og þröngu miðjusæti þá drifum við hjónin okkur upp í rútu og fórum til Boston þar sem við hittum foreldra og systur Elmars. Að segja að það hafi verið dekrað við okkur þar myndi engan veginn ná að lýsa því lúxuslífi sem við lifðum þessa helgi. Við borðuðum einstaklega góðan mat, skoðuðum borgina og nutum þess að vera saman.

En það er líka gott að vera komin í hversdagsleikann aftur. Elmar er sestur við skrifborðið og skrifar og les af miklum eldmóð og ég er farin að vinna aftur í litlu vafasömu bókabúðinni. New York hefur tekið vel á móti okkur og skartar sínu fegursta. Sólin skín og hitinn er um og yfir 20 gráður, trén skarta fallegum litlum hvítum og bleikum blómum og borgarbúar spássera um í nýuppteknum sumarfötum. Ég nýt þess að geta lagt vetrarkápuna mína til hliðar og er strax farin að plana hvað ég get matreitt til að taka með í lautarferð í Miðgarð um helgina.

Í þessum sumaryl er auðvitað bara við hæfi að fá sér salat í kvöldmat og eftir miklar pælingar ákvað ég að skella mér á tælenskt vatnsmelónusalat úr upppáhaldsbókinni minni eftir Jamie Oliver (Jamie’s Dinners). Ég hef aðeins breytt frá upprunalegu uppskriftinni og birti þá uppskrift hér að neðan. Salatið var einmitt það sem þurfti eftir langan og heitan dag. Vatnsmelónan var svo fersk og blandaðist vel með ostinum og kryddjurtunum, og salatsósan ásamt kóríanderblöðunum gáfu salatinu asískan keim. Vonandi fer sumarið að klekja sig út á Skerinu fagra svo þið getið skorið í salat og borðað út á palli.

Tælenskt vatnsmelónusalat

  • 1/4 vatnsmelóna
  • 2 handfylli af fersku kóríander
  • 2 handfylli klettasalat
  • 2 handfylli fersk mynta, laufin plokkuð af stilkunum
  • 1 lítið knippi af radísum, skornar í fínar sneiðar
  • 1 handfylli af graskersfræjum (eða jarðhnetur eða sesamfræ)
  • 120 g fetaostur
Salatsósa:
  • 2 sm langur bútur af engifer, afhýddur og rifinn
  • 1 chilialdin, fræhreinsað og skorið í þunnar sneiðar
  • 1 msk sojasósa
  • 3 msk ólívuolía
  • 1 tsk sesamolíu
  • safi úr 2 límónum
  • sjávarsalt og ferskur malaður pipar
Aðferð:

Skerið hýðið frá vatnsmelónunni og skerið kjötið í litla teninga. Hreinsið frá fræin á meðan þið skerið niður melónuna (það skiptir ekki miklu máli ef einhver fræ verða eftir).
Rífið þykkri og seigari hluta stilksins frá kóríanderinu og haldið fínni hluta stilksins með laufunum. Setjið í skál ásamt klettasalatinu, myntunni, melónunni og radísunum.
Setjið engifer, chili, sojasósu, ólívuolíu og sesamolíu í minni skál og bætið við nógu miklum límónusafa til að skera í sundur olíuna. Kryddið með salti og pipar og smakkið til.
Hitið graskersfræin á pönnu þar til fer að smella í þeim. Hellið þeim í mortél og berjið þau aðeins þar til þau springa (ekki mauka þau samt!).
Hellið salatsósunni yfir salatið og blandið vel saman. Skiptið á milli diska, sáldrið graskersfræjunum yfir og myljið fetaostinn yfir.
Fyrir 4
Auglýsingar
3 athugasemdir Post a comment
  1. Emmi #

    Loksins! Þetta var rosalega gott.

    27/04/2011
  2. Inga Þórey #

    Velkomin til baka elsku besta mín! Ég fékk nú eiginlega bara saknaðarsting við að lesa færsluna þína – ég vildi óska að við Gísli Hrafn værum barasta að spóka okkur með þér í vorinu úti í stóra eplinu frekar en að hýrast inni í rokrassgatinu á fróni! Hlakka til að knúsa þig…styttist óðum!

    28/04/2011
  3. Inga Þórey #

    hírast

    ;-)

    28/04/2011

Skildu eftir athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s

%d bloggurum líkar þetta: