Kjúklingur í Tikka Masala

Það snjóar og snjóar í New York og ef eitthvað er að marka veðurspár þá heldur það áfram næstu daga. Við förum því seint að sjá fyrir endann á slabbi og klakapollum á göngustígum borgarinnar. Það er bara janúar en ég er strax farin að bíða eftir vorinu og hlakka til dagsins sem ég get pakkað niður vetrarfötunum og skónum og farið að spóka mig í Central Park. Það fer að verða augljóst að ég ætti að eiga heima í þurru og hlýju landi. Af hverju er svona langt til Ástralíu?

Annars fer hversdagslífið að komast í fastar skorður þar sem Elmar byrjar að kenna og sækja tíma í næstu viku og ég er byrjuð að sækja tíma í New York University. Ég fór í minn fyrsta tíma í gær og mér fannst alveg yndislegt að setjast aftur á skólabekk og fá að tala um lestrarefni vikunnar. Það er Whole Foods verslun rétt hjá skólanum og ég nýtti tækifærið, stökk inn og keypti í þennan indverska rétt og greip kippu af ísköldum bjór á tilboði í leiðinni. Rétturinn er mjög góður, kryddaður og sterkur. Ég notaði kjúklingalæri í staðinn fyrir kjúklingabringur og mér fannst það koma mjög vel út – enda eru lærin yfirleitt meyrari heldur en bringurnar. Svo er auðvitað hægt að nota lambakjöt í staðinn fyrir kjúklingakjöt og mig grunar að það komi mjög vel út, sérstaklega ef lambakjötið er grillað.

Kjúklingur í Tikka Masala

(Jamie Oliver: Jamie’s Dinners)

• 6 hvítlauksgeirar
• 6 cm engiferrót, skrælið hýðið af
• 2 – 3 fersk rauð chilialdin, fín söxuð
• Ólívuolía
• 1 msk sinnepsfræ
• 1 msk paprikuduft
• 2 tsk malað kúmin
• 2 tsk malað kóríander
• 3 msk garam masala
• 180 ml hreint jógúrt
• 4 meðalstórar kjúklingabringur, eða 6 kjúklingalæri, skornar í stóra bita
• 15 g smjör
• 2 meðalstórir laukar, skornir í þunnar sneiðar
• 2 msk tómatpúrra
• Handfylli af kasjúhnetum, malaðar
• Sjávarsalt
• 100 ml rjómi
• Handfylli af fersku kóríaner, gróft saxað
• Safi úr 2 límónum

Aðferð:

Rífið hvítlauksgeirana og engiferrótina fínt niður með rifjárni, setjið í skál og bætið chilipiparnum saman við. Hitið ca 1/2 msk af ólívuolíu á pönnu og bætið sinnepsfræjunum saman við. Bætið þeim saman við hvítlaukinn, engiferið og chilipiparinn þegar fer að smella í fræjunum ásamt paprikunni, kúmininu, kóríandernum (malaða) og 2 msk af garam masala. Skiptið svo kryddblöndunni í tvennt og hrærið helmingnum saman við jógúrtið. Blandið kjúklingabitunum saman við jógúrtblönduna og leyfið kjúklingnum að marinerast í rúman hálftíma.

Bræðið smjörið í sömu pönnu og notuð var fyrir sinnepsfræin og steikið laukinn og restinni af kryddblöndunni. Eldið við vægan hita í ca. 15 mínútur, passið að laukurinn brúnist ekki of mikið. Bætið við tómatpúrrunni, hnetunum, 500 ml af vatni og 1/2 tsk af salti. Hærið vel og leyfið að hægsjóða í nokkrar mínútur. Leyfið sósunni að þykkjast svolítið, slökkvið síðan undir og setjið til hliðar.

Eldið kjúklinginn á heitri grillpönnu (eða á grillinu) þangað til hann hefur eldast í gegn. Það er einnig hægt að elda hann í ofninum á háum hita (280°C) eða á grillstillingunni ef hún er til staðar í ca. 15 – 20 mínútur (eftir því hversu stórir bitarnir eru).

Hitið sósuna og bætið rjómanum saman við ásamt 1 msk af garam masala. Bragðið – ef það virðist vanta fyllingu í bragðið eða ef það er lítið kryddbragð bætið þá meira salti saman við. Slökkvið undir pönnunni þegarsósan fer að sjóða og bætið kjúklingnum saman við.

Berið fram með fersku kóríander, límónusneiðum, heitum hrísgrjónum og/eða naan brauði.

Fyrir 4