Skip to content

Okt 3

5 athugasemdir

Massaman karrí

Ég dró Elmar með mér suður í Kínahverfið í gær til að versla hráefni í þetta gómsæta karrí. Að fara þangað er eins og að stíga inn í annan heim, allir (með fáum undantekningum) tala kínversku eða víetnömsku, öll skilti eru á kínversku og maður finnur ótrúlegustu hráefni í matarmörkuðunum. Mér finnast skúringarföturnar með lifandi froskum í skemmtilegastar, þeir láta mann fá tangir svo maður getur dregið upp úr feitasta og ljótasta froskinn. Ég hef reyndar ekki reynt það ennþá en kannski ef ég finn girnilega froskauppskrift þá læt ég á það reyna.

Þessi uppskrift er smá breyting á uppskrift úr bókinni The Asian Vegan Kitchen eftir Hemu Parekh. Ég og dóttir Hemu erum mjög góðar vinkonur og við vorum nánast óaðskiljanlegar þegar við vorum saman í skóla í Tokyo. Ég eyddi því nokkrum árum í eldhúsinu hennar Hemu og hún var mjög dugleg að gefa mér að borða (sérstaklega þar sem ég var mjög dugleg að borða). Maturinn hennar er það ljúffengasta sem ég hef smakkað og ég er mjög spennt yfir bókinni hennar. Ég fæ reyndar oft hroll yfir orðum eins og ,,gluten-free“ og ,,vegan“ því ég á bara erfitt með að skilja slíkar sérþarfir í mataræði. En í rauninni er mjög mikið af mat í Asíu ,,vegan“ matur þar sem mjólkurvörur og kjöt eru alls ekki nauðsynleg uppistaða í réttum þar og því er ég alls ekki afhuga þessari bók.

Það er auðvelt að leika sér með þessa uppskrift. Það má minnka magn af kartöflum og skipta út fyrir kjúkling, tófú eða svínakjöt, það má líka nota sveppi í þennan rétt. Ef þú vilt milda laukbragðið þá geturðu steikt laukinn í pönnu þangað til hann verður glær áður en honum er bætt við réttinn. Ég mæli svo með að bera réttinn fram með sjóðandi heitum jasmín hrísgrjónum.


SJÁ UPPSKRIFT

Sep 28

11 athugasemdir

Quesadillur með guacamole

Við höfum fengið marga góða gesti til okkar undanfarið og sökum þess hef ég ekki sett inn neinar færslur undanfarið. Á móti kemur er að tölvan mín er að verða sneisafull af uppskriftum og myndum af réttum sem bíða þess að rata á netið. Það ætti líka að færast smá hasar í eldamennskuna hjá mér því að pabbi minn elskulegur (sem var einn af gestum okkar) gaf mér margt nýtt í eldhúsið þar á meðal handknúna pastavél(!). Ég er reyndar ekki búin að nota hana ennþá en ég hlakka mikið til og auðvitað læt ég ykkur vita hvort ég geti notað vélina án þess að leggja eldhúsið í rúst.

Ég er búin að vera alveg háð þessari uppskrift í rúmt ár.  Hún er einstaklega fljótleg og það er hægt að breyta henni auðveldlega eftir því hvað er til í ísskápnum. Ef þú átt afgangskjöt frá því deginum áður þá getur þú rifið það niður og notað það sem fyllingu ásamt osti (sem verður alltaf að vera með svo að þær límist saman), lauk, jalapeno í krukku og í raun hverju sem þér dettur í hug. Ég sá fyrst quesadillur með hráskinku í bókinni hennar Nígellu (Nigella með hraði) og þó að hráskinkan er dýr þá verða quesadillurnar alveg ómótstæðilega góðar. Á myndinni hér fyrir neðan hef ég notað tvær hráskinkur á hverja tortillu en það er auðvitað hægt að spara skinkuna og nota bara eina sneið. Það er líka mjög gott að nota kóríander í fyllinguna til að hressa aðeins upp á ostinn og kjötið.

Ég læt líka fylgja með uppskrift að guacamole. Ég veit ekki með ykkur en mér finnst guacamole úr krukku alveg hrikalega óspennandi. Þetta er yfirleitt ljósgrænt bragðlaust sull sem á ekkert skylt við ferskt guacamole. Fólk hefur reyndar ólíkar skoðanir um hvernig ferskt guacamole á að vera, sumir vilja hafa það alveg kekkjalaust en aðrir (ég þar á meðal) vilja hafa það gróft með greinilegum tómat- og laukbitum. Það sem þarf að passa mjög vel þegar guacamole er blandað er að öll hráefni séu fersk og að avókadóinn sé alveg þroskaður. Avókadóinn dökknar hratt og þess vegna verður maður að búa til guacamole stuttu áður en það er borið fram. Til þess að forðast snertingu við súrefni þá er gott að setja plastfilmu yfir skálina.

SJÁ UPPSKRIFT

Sep 16

8 athugasemdir

Brownies með súkkulaði,fudge’ kremi

Það er búið að fara mjög vel um okkur í Stóra Eplinu síðustu vikuna. Elmar er búinn að vera mjög upptekinn við nám og kennslu og ég reyni mitt besta að vera dugleg í þeim verkefnum sem ég hef ákveðið að klára. Við höfum líka farið mikið út á meðal fólks síðustu daga. Við kynntumst íslenskum hjónum sem eru nýflutt til borgarinnar og búa hinum megin við Miklagarð og við fórum í partí til Ayeshu vinkonu minnar. Partý hjá henni eru alltaf áhugaverð og þá sérstaklega það fólk sem maður hittir hjá henni. Þar sem hún vinnur sjálf í banka þá er mikið af vinum hennar og kunningjum einnig í fjármálabransanum og töluvert ólíkt því fólki sem við höfum kannski verið að umgangast. Sem dæmi, þá vorum við Elmar mætt ágætlega snemma í partíið og hittum fyrir bandarísk hjón sem eru aðeins eldri en við. Elmar talaði við manninn og þegar hann sagðist vera frá Íslandi þá fór maðurinn að segja honum að hann vissi nú lítið um Ísland en honum hafi verið boðið í ‘bachelor party’ í Reykjavík hjá félaga sínum. Þá flaug tilvonandi brúðgumi til Reykjavíkur ásamt tíu nánustu vinum sínum, sem væri nú kannski ekki nein nýlunda nema þeir keyptu flugmiða fyrir sirka þrjátíu kvensur sem flugu að frá mismunandi stöðum í Evrópu til að skemmta köppunum. Á meðan lýsti konan hans, nýbúin að eignast barn, fyrir mér hvað umhugsun ungabarns væri ,unrewarding’ reynsla og að hún gæti ekki beðið eftir að geta ráðið barnfóstru og komist aftur á skrifstofuna svo hún gæti umgengist ,alvöru’ fólk. Þetta fannst mér mjög skemmtilegt og kostulegt allt saman.

Annars er vinafólk okkar að koma til okkar í kvöld frá Íslandi. Þar sem vinkona mín á afmæli á morgun ákvað ég að ég yrði nú að baka handa henni afmælisköku. Næsta ákvörðun mín var að baka eitthvað amerískt og því varð brownieskaka fyrir valinu. En svo fór allt að ganga á afturfótunum eins og svo oft vill gerast þegar ég vil virkilega að eitthvað heppnist sérstaklega vel. Kakan var mjög ljót (sem er kannski ekkert svo skrítið því brownies eru alltaf ljótar – ef einhver getur búið til fallegar og bragðgóðar brownies þá vil ég ekki þekkja viðkomandi), hún liðaðist í sundur og var bara svona almennt til háborinnar skammar. Ég ákvað þess vegna að búa til súkkulaðikrem svo ég gæti nú falið ósköpin og spaslað í gjárnar. Súkkulaðikremið er svosum voðalega bragðgott og ég ákvað að skreyta kökudrusluna með hindberjum. En hindberin líta eiginlega bara út eins og vanskapaðir fjallstindar og ég er ekki alveg sannfærð um að þau fegri kökuna.

Af hverju fær þessi uppskrift að fara inn á vefsíðuna? Af því að þetta er samt gott á bragðið og ég elska þessa brownie uppskrift. Ef að ég á alltaf að sleppa því sem mér finnst ég hafa klúðrað þá myndi ég bara setja inn eina til tvær færslur á mánuði og þá væri enginn ánægður, ræt?

SJÁ UPPSKRIFT

Sep 12

6 athugasemdir

Kjúklingabaunir í engifersósu & mangó lassi

Það er komið haust í New York og ég kveð hitann með söknuði. Það hefur kólnað heilmikið og það rigndi í allan dag. Við erum búin að eyða þessum sunnudegi innandyra að lesa og skrifa og því datt mér í hug að taka vel á móti haustinu með bragðmiklum mat. Við erum mjög hrifin af indverskum mat en lengi vel þá fannst mér allar tilraunir mínar að matreiða hann heima fyrir vera ansi misheppnaðar. Maturinn var ýmist of bragðlaus, of saltur eða bara hreinlega vondur. Ég ákvað á endanum að þetta væri ekki mér að kenna heldur uppskriftunum sem ég var að nota (einstaklega heppilegt) og lagðist í bókarannsóknir á amazon. Ég rakst á endanum á þessa bók og hún hefur reynst mér afskaplega vel, allt sem ég bý til er með þessum indælis indverska keim.

Í kvöld var kjúklingabaunaréttur fyrir valinu en mig langaði líka til að búa til eitthvað aukalega með því. Ég leitaði uppi uppskrift að mangó lassa, sem tæknilega séð er sumardrykkur en það er bara ekki hægt að ætlast til að ég sleppi sumrinu svo auðveldlega!

 

SJÁ UPPSKRIFTIR

Sep 8

6 athugasemdir

Cobb salat

Það er orðið ansi langt síðan ég setti inn færslu síðast en ég hef afsökun! Við hjónin flúðum hitann í New York og fórum til New England með vinum okkar. Þau leigja hús í Hanover í New Hampshire (þar sem Dartmouth háskólinn er) og við vorum þar í einstaklega góðu yfirlæti í einu stærsta húsi sem ég hef komið inní. Við hjóluðum um Vermont, fórum í fjallgöngu, heimsóttum fæðingarstað Jospephs Smiths Jr. (stofnanda Mormónakirkjunnar) og fórum í brugghús. Við borðuðum heilan helling af maís og ég verð að segja að sá maís sem ég hef verið að borða sem krakki á Íslandi er eitthvað allt annað. Maísinn þarna var svo ferskur – enda fengum við hann beint af ekrunni – hann var sætur með hnetukeim og algjört lostæti, ólíkt þessu svínafóðri sem við fáum heima.

Bandaríkin eru einstaklega áhugaverður staður og það er margt svo sláandi ólíkt því sem við þekkjum í Evrópu. Bandaríkjamenn taka til dæmis ,frelsið’ sitt mjög alvarlega og þetta var sérstaklega augljóst þegar við vorum í New Hampshire. Allir bílar sem skráðir eru í því fylki hafa númeraplötu sem bera þessi einkunnarorð:

Hitinn í borginni hefur lítið sem ekkert lækkað, sólin skín og á daginn fer hitinn ekki undir þrjátíu gráðurnar. Ég var samt sem áður mjög svöng í gær og ákvað þess vegna að búa til matarmikið salat. Ég hef oft fengið Cobb salat hjá pabba mínum og það er alveg himneskt. Með uppskriftina frá honum og uppskrift sem ég fann á Smitten Kitchen til hliðsjónar bjó ég til alveg svaðalega gott salat. Cobb salatið var fyrst búið til á fjórða áratugnum á veitingastað í Hollywood og var nefnt eftir eiganda staðarins, Mr. Robert Cobb. Ég held sjálf að þetta salat geti ekki klikkað enda er það samansett af svo bragðgóðu hréfni. Ég meina, það er beikon í þessu! Þetta tók okkur svolítinn tíma að undirbúa en við vorum ekkert mjög skipulögð í gærkvöldi. Það er best að byrja á að steikja kjúklinginn (hann þarf að kólna áður en honum er bætt út í salatið) og harðsjóða eggin.

SJÁ UPPSKRIFT

Sep 1

10 athugasemdir

Linguine með sveppum, sítrónu og kryddjurtum

Það er afskaplega gott veður í New York þessa dagana og ég reyni að passa að njóta þess áður veturinn heldur innreið sína í líf okkar. Ég verð að viðurkenna að ég fæ væg kvíðaköst þegar ég hugsa til þess hvað mér var hrikalega kalt síðasta vetur. Elmar finnur að vísu minna fyrir þessu en ég og vinir okkar hérna úti verða oft forviða þegar ég kvarta undan kulda. ,,En þú ert frá Íslandi! Hvernig getur þér verið kalt?” Eins og við séum einhver erfðabreyttur kynstofn sem er svo harðger að hann finnur ekki fyrir frosti. Pff. En það er ekki vetur núna heldur er dásamlegt sumar með sól og 34° hita og ég elska það. Þessi hiti gerir það samt að verkum að ég finn ekki fyrir mikilli lyst á þungum hægeldaðum mat. Fyrir utan að það er ekkert grín að standa lengi fyrir framan eldavélina okkar í þessum hita. Ég ákvað því á leiðinni í Whole Foods í dag að versla í einn uppáhaldsréttinn okkar frá hinni unaðslegu Nígellu.

Þessi réttur er svo fáránlega einfaldur að það ætti ekki að vera hægt að klúðra honum. Að minnsta kosti hef ég ekki klúðrað honum hingað til og ég er ansi lunkin við að klúðra hinum ótrúlegustu hlutum. Sítrónan gefur ó-svo ferskt bragð og sveppirnir í þessu sítrónu-kryddjurtalegi verða alveg ómótstæðilegir. Uppskriftin segir að það eigi að nota cremini sveppi en ég hef líka notað þessa venjulegu hvítu sveppi sem eru alltaf til heima með góðum árangri. Mér finnst rétturinn ekki fullkomnaður án fersks pipars og parmesanosts og persónulega finnst mér að það eigi alls ekki að borða hann án þess að hafa hvítvín við hönd.

 

SJÁ UPPSKRIFT

← Older Entries
Newer Entries →