Skip to content

Posts from the ‘Morgunmatur’ Category

Granóla með kókos og möndlum

Ég er búin að borða hafragraut á hverjum morgni í metlangan tíma. Hafragrautur er frábær og ódýr leið til að byrja daginn og býður upp á ótalmarga möguleika – Elmar fær sér graut með frosnum bláberjum, ég fæ mér með hunangi og hnetum, og á sumrin þá fáum við okkur fersk ber út á grautinn. Lífið er dottið í ákveðna rútínu, vetrargráminn hangir yfir borginni og berst ötullega gegn vorinu. Ég tók því ákvörðun um að breyta aðeins til og búa til granóla til að borða í morgunmat.

Þetta granóla er frekar sætt (ég ætla að minnka aðeins sykurmagnið þegar ég bý það til næst) en það er líka stórgott. Kakó, kókos, möndlum og höfrum er velt upp úr hunangskaramellu og látið ristast í ofni þar til það verður stökkt og gullið. Ég borða það á morgnana með grískri jógúrt og stelst til að sáldra því yfir rjómaís á kvöldin. Svolítið syndsamlegt en ágætis huggun á meðan ég bíð eftir vorinu.

SJÁ UPPSKRIFT

Granóla með hunangi og möndlum

Þegar systir mín var í heimsókn þá borðuðum við morgunmat á ástralska kaffihúsinu Milk bar sem er hérna í nánasta nágrenni. Ég fékk mér granólað þeirra sem þeir blanda og rista á staðnum með grískri jógúrt og ég hef varla hugsað um annað síðan. Ég vakna á morgnana og það eina sem mig langar virkilega í að borða er granólað þeirra og á hverjum morgni þarf ég að minna mig á að ég verð að sýna smá aga og skynsemi og fá mér eitthvað að nasla heima. Því að þetta blessaða granóla þeirra með gríska jógúrtinu og ávöxtum kostar átta dali. Átta dali! 

Eins og skynsamri og ágætlega eldhúsvanri manneskju sæmir þá ákvað ég bara að taka málin í mínar eigin hendur. Ég týndi fram þær hnetur, fræ, hafra og þurrkaða ávexti sem ég fann inni í skáp, sullaði slatta af hunangi yfir og skellti inn í ofn. Eftir nokkrar mínútur byrjaði íbúðin að ilma af ristuðum hnetum og hunangi og eftir nokkrar mínútur í viðbót tók ég út fallega gyllt granóla með möndlum og pekanhnetum.

Og núna á ég stóra krukku af granóla inni í ísskáp og get búið mér til þennan dýrindis morgunmat fyrir miklu miklu minna en átta dali. Ég set smá hreina gríska jógúrt í skál, set smá hunang út í jógúrtið og hræri, sáldra granóla yfir og toppa með ferskum berjum (í þetta sinn bláberjum). Ekki láta plata ykkur til að kaupa lítinn poka af granóla á himinháu verði því heimaristað granóla er svo einfalt og svo ljúffengt. Uppskriftina má auðvitað laga að því sem til er í skápunum hjá ykkur – notið þær hnetur sem þið hafið við höndina, sleppið sykrinum ef þið eruð ekki sömu sætindagrísir og ég og skellið smá þurrkuðum ávöxtum eða súkkulaðidropum út í ef slíkt heillar ykkur.

SJÁ UPPSKRIFT

Heilhveitipönnukökur með banana og valhnetum ásamt soðsteiktum eplum

Við erum svo heppin að fá að njóta haustlitanna í óvenju langan tíma í ár. Veðrið hefur í rauninni verið afar gott og hverfið okkar er skreytt gulu, grænu, rauðu og appelsínugulu laufþaki. Einstaka sinnum rignir laufblöðum og minnir mann á hversu skammvinn þessi fallega árstíð í rauninni er og rekur mann út í daglega göngutúra í allri litadýrðinni. Jólin eru í raun skammt undan og ég á erfitt með að trúa því að Þakkargjörðarhátíðin er handan við hornið.

En eins mikið og mig langar til að vera úti í göngutúrum með myndavélina mína þá blasir sú staðreynd við að lok annarinnar er yfirvofandi og neyðir mig til þess að gera doktorsverkefninu mínu góð skil. Stundum finnst mér þetta allt saman vera aðeins of fullorðins og súrrealískt. Og hvað gerir maður þá? Ég mæli með pönnukökum. Pönnukökur gera allt betra. Þær minna mig á að stundum er gott að vera fullorðin og mega hella úr hálfri sírópskrukku yfir morgunmatinn sinn án þess að nokkur geti sagt manni að gæta hófs.

Ég notaði fínmalað heilhveiti í þessar pönnukökur og hugsa að ég haldi því áfram upp úr þessu. Ekki af því að heilhveiti er hollara en það hvíta, mér er nú alveg sama um það.  Heldur af því að heilhveitið gefur aðeins meira bragð og ég er ekki frá því að það sé lúmskur hnetukeimur af því. Það má auðvitað nota venjulegt heilhveiti í staðinn eða hvítt hveiti ef þið eruð hrifnari af því. Ég hafði keypt tvö epli á markaðinum og fannst þau heldur súr þannig að ég velti þeim upp úr smá sykri og steikti þau upp úr smjöri á pönnu. Þau voru mjög skemmtileg viðbót. Ég stappaði líka einn banana og saxaði handfylli af valhnetum og bætti við deigið og var mjög ánægð með útkomuna.

SJÁ UPPSKRIFT

Jólagjafahugmynd #2: Granóla með súkkulaðibitum

Ég er farin að hlakka mikið til jólanna. Það gerist yfirleitt þegar sólin hverfur fyrir klukkan fimm á daginn að ég finn fyrir mikilli þörf til að hengja upp lítil jólaljós alls staðar og kveikja á kertum. Ég hef aldrei kunnað vel við myrkrið sem fylgir vetrartíðinni og þó ég sé flutt frá Íslandi þá finnst mér ljósið of skammlíft í New York. Nú neyðist ég til að draga djúpt andann og herða mig – mér leiðist veturinn óskaplega.

En þrátt fyrir vetrarfælni mína þá þykir mér afskaplega vænt um jólin. Ef jólanna nyti ekki við þá væri ég búin að gefast upp í byrjun desember. Það er því sérstaklega upplífgandi að halda áfram með jólagjafafærslurnar. Í þessari viku bjó ég til granóla. Granóla er mjög einfalt og mér finnst þessi uppskrift eiga vel við jólin – kanilkryddað með súkkulaðibitum og þurrkuðum trönuberjum. Það er hægt að skipta út súkkulaðibitunum og trönuberjunum fyrir annað gúmmelaði, nota heslihnetur í staðinn fyrir möndlur, skipta út hlynsírópinu fyrir hunang – möguleikarnir eru margir. Það má borða það út í mjólk eða súrmjólk eða sem snakk beint upp úr krukkunni. Það er gott að stinga því í poka og nota sem nasl í fjallgöngur (eða aðrar göngur). Þetta er því tilvalin gjöf fyrir göngumanninn eða handa þeim sem kunna að meta góðan morgunmat.

SJÁ UPPSKRIFT

Kryddaðar chai pönnukökur

Það er helgi og fyrir þau ykkar sem fylgjast regulega með þá vitið þið að ég get ekki staðist að prófa nýja pönnukökuuppskrift á laugardögum. Pönnukökur helgarinnar eru alls ólíkar þeim sem ég hef búið til áður og passa sérstaklega vel við svala og fallega haustveðrið í Brooklyn. Þær innihalda margar tegundir af kryddi en þetta eru krydd sem ég á alltaf uppi í skáp fyrir bakstur og indverska matseld. Það er því mun margslungnara bragð af þeim en af öðrum pönnukökum og kanillinn og engiferið gefa þeim smá hita. Þær eru sniðugar ef maður vill tilbreytingu í helgarpönnsurnar sínar (auðvitað held ég að þið búið til pönnukökur allar helgar líka!).

SJÁ UPPSKRIFT

Bananapönnukökur með bláberjahlynsírópi


Ég er mjög þakklát fyrir hrekkjavökuhátíðina í Bandaríkjunum. Ég hef reyndar ekkert gaman af því að klæða mig í búning, hvað þá að finna einhverja snilldarhugmynd til að útfæra og reyni því að hafa mig hæga á meðan fólk hleypur um í ótrúlegustu múnderingum. Reyndar verð ég að viðurkenna að ég finn lítinn innblástur í búningaverslunum. Vil ég vera sexí hjúkka, sexí nunna, sexí pandabjörn (já, það er til) eða sexí vatnsmelóna (já! líka til)? Nei, takk. En ég er þakklát vegna þess að þetta hægir aðeins á jólamaníunni hérna úti og það er aldrei fyrr en eftir hrekkjavöku sem jóladótið tekur yfir.

Ekki að ég hafi neitt út á jólin að setja. Ég er forfallið jólabarn og það er fátt sem mér finnst eins skemmtilegt og að halda upp á jólin. Ég er á því að jólin þurfi ekki að vera rándýrt fyrirbæri með útgjaldamiklu gjafastandi. Heimatilbúnar gjafir eru oft stórskemmtilegar, persónulegar og mun ódýrari en aðkeyptar gjafir. Ég ætla þess vegna að koma með eina gjafahugmynd í viku fram að jólum og ef ég kann ennþá að reikna þá gerir það sjö tillögur allt í allt! Þetta mun allt passa ofan í ódýrar glerkrukkur, dósir eða pappakassa og verður eitthvað aðeins frumlegra en smákökur í dollu (þó ég sé mjög hrifin af slíkum gjöfum). Þetta verða misflóknar uppskriftir en vonandi gefur þetta ykkur einhverjar skemmtilegar hugmyndir. Og ætli ég fari ekki að vera tilbúin að bjóða jólin velkomin, þetta var útsýnið úr glugganum okkar síðustu helgi:

Pönnukökuæðið mitt hefur engin takmörk. Ég vil pönnukökur alla morgna og þá helst nýja útgáfu í hvert skipti. En þar sem móðir mín náði að kenna mér smá stillingu í æsku þá held ég aftur af mér (með herkjum) og steiki bara pönnukökur einu sinni í viku. Í þetta sinn töfruðum við fram bananapönnukökur og suðum saman frosin bláber og hlynsíróp. Sósan er algjör snilld og passar örugglega vel við flestar tegundir af amerískum pönnsum. Bananapönnukökurnar eru mjög bragðgóðar og saðsamar en ég myndi minnka aðeins sykurmagnið næst þegar ég geri þær. Ég vil frekar hafa pönnukökurnar minna sætar svo ég geti sleppt mér algjörlega í sírópsæðinu. Kannist þið við þetta?

SJÁ UPPSKRIFT

%d bloggurum líkar þetta: