Heimalöguð pítsa

Við erum komin heim til Íslands í stutt stopp áður en við höldum út í hitann, svitann og íbúðarleitarstressið í New York. Ágústmánuður getur verið þrúgandi í borginni, hitinn er mikill og loftrakinn gerir það að verkum að líkaminn nær ekki að kæla sig sem skyldi. Ég er bæði spennt og afskapleg smeyk við að fara út að leita að íbúð þar sem ég fór næstum því að gráta eitt kvöldið í lestinni þegar við vorum í slíkum tilfæringum síðast. Það er nefnilega enginn skortur á ógeðslegum íbúðum á Manhattan á uppsprengdu verði. Enda erum við staðráðin í að fara yfir East River og setjast að í Brooklyn.

En áður en við förum út þá verðum við á Íslandi í tæpar tvær vikur, bæði norður í Eyjafirði og í höfuðborginni. Ég er einstaklega sátt við að vera komin úr matvörukrísunni í Björgvin og í þéttpakkaðan ísskáp foreldra minna. Við ákváðum að búa til heimalagaðar pítsur í gærkvöldi og fórum beint í að skera niður álegg, hnoða saman deig og sjóða sósu.

Við Elmar höfum verið ansi iðin við að búa til pítsur heima í New York enda eru þær mun betri en þær pítsur sem keyptar eru frá sveittum alþjóðaveitingakeðjum og ég held að við þurfum ekki einu sinni að bera þær saman við djúpfrystar pítsur. Deigið okkar þarf ekki að lyfta sér og má baka strax í heitum ofni til að gera stökkan og þunnan pítsubotn. Hér að neðan er líka uppskrift að uppáhaldspítsusósu okkar og ég gef nokkrar tillögur að ljúffengum áleggsblöndum.

Heimalöguð pítsa

Deig:

• 2 dl heilhveiti
• 1 dl mjólk
• 1 tsk lyftiduft
• 1 msk olía
• 1 msk chiliflögur
• 1 tsk salt

Aðferð:

Blandið þurrefnum vel saman. Bætið olíu og mjólk saman við og þegar deigið þéttist farið að hnoða. Ef deigið er of blautt, bætið þá meira hveiti saman við. Hnoðið í kúlu og fletjið síðan út. Setjið í 200°C heitan ofn og forbakið í ca. 5 mínútur. Smyrjið pítsusósu og raðið áleggi á pítsuna og bakið í ofni við 275°C þar til osturinn tekur á sig gylltan blæ.

Gerir 1 pítsubotn

Pítsusósa:

• 1 msk ólívuolía
• 1 laukur, grófsaxaður
• 2 hvítlauksgeirar, fínsaxaðir
• 1 dós niðursoðnir tómatar
• 1 msk tómatþykkni
• 1 tsk basilíka
• 1 tsk óreganó
• 1/4 tsk – 1 tsk chiliflögur*
• 1 msk sykri
• Salt og pipar

[*Upphaflega var þetta 1 tsk chiliflögur en eftir ábendingu frá lesanda hef ég breytt magninu. Það er gott að byrja  með 1/4 tsk og bæta við chiliflögum eftir smekk síðar meir.]

Aðferð:

Hitið laukinn í olíunni þar til hann mýkist og verður glær. Bætið hvítlauknum út í og steikið í ca. 2 mínútur.

Merjið tómatana og blandið þeim saman við laukinn ásamt tómatþykkninu. Kryddið með óreganó, basilíku, chiliflögum, sykri og salti og pipar.

Látið sjóða við vægan hita í opnum potti í 10 til 15 mínútur eða þar til sósan hefur þykknað.

[Á þessu stigi má taka pottinn af hitanum og mauka með töfrasprota.]

Kælið sósuna og smyrjið svo á pítsubotninn.

Gerir sósu á 2 pítsubotna

Tillögur að áleggi:

Okkur finnst gott að setja klettasalat ofan á pítsusneiðar til að gefa þeim meiri karakter og ferskara bragð.

Ítölsk pítsa:

• Parmaskinka
• Tómatar
• Ferskur mozzarellaostur
• Fersk basilíkulauf

Humarpítsa:

• Humarhalar veltir upp úr tómatpestó og steiktir á pönnu með smjöri og mörðu hvítlauksrifi
• Ferskur mozzarellaostur
• Fersk basilíkulauf

Pepperónípítsa:

• Pepperóní
• Svartar ólívur
• Jalapeno
• Steiktir sveppir
• Tómatsneiðar
• Rjómaostur